Joseph Kamaru - Certificate Ya Maisha Lyrics

Githĩ wanjĩraga tũthiĩ ũhiki inĩ ũkĩmenyaga
Atĩ nĩ ũgũcoka ũndige na ũthiĩ ũkamũgĩre
Mwoka nake ũhiki inĩ wonanagia mũtirĩ nake
Na ndehũgũra na kũngĩ ũkamunĩra riitho
Ndathiĩ kahinda ngĩũka ndakorire agũĩkarĩĩre
Ngĩigua ta ndatemwo na rwenji ngĩrora na kũngĩ
Wendaga kũũraga ndutura igĩrĩ na ihiga rĩmwe
Uriganĩirwo atĩ mũcemi akorire mũkungi

Githĩ ona rĩrĩa wanyinagia ndaaci kũu ũhiki inĩ
Nĩ fulani wanjoyagĩra nĩguo wone kamweke
Nĩwagĩthire nake wone kana kũrĩ ũndũ ingĩka
Tondũ nĩwarĩkĩtie kũmenya atĩ nĩngwendete
Ndagwethire kũu ũhiki inĩ kwerũ o kinya thegi
Andũ manyona maugage atĩ nĩkũrĩĩo ndĩĩtwo
Naniĩ ndameraga na ngoro kaba ndĩĩo nĩ wendo
Handũ ha kũũrĩo nĩ njohi ndagwa ngaaga muuoi

Gũtirĩ ũndũ nĩwarĩmire kũngĩ na ũkĩhanda
Ugĩtiga gwaku gũkĩũra mwendwa no ndũrĩ ũndũ
Ndagwetereire ũhiki inĩ kinya ngũkũ ikĩgamba
Ngĩheo lĩfuti ngĩinũka hana mũndũ mũkuĩre
Tondũ nĩwanduire turera ndũre ngumaga thutha
Ningũkũhe certificate waambe ũrĩange maisha
Ona kaba ũngĩathiĩte ũhiki inĩ tũtarĩ nawe
Handũ ha niĩ ũnjĩke matharau mbere ya andũ.

Uthiĩ na angĩ kana ũikare mwendwa no ngwendete
Ona wanjĩĩra tũthii ũhiki rũciũ no tũgathiĩ
Nĩndakũhe certificate wĩke o ũrĩa ũngĩenda
Tondũ ona ingĩenda gũgũtiga mwendwa ndingĩhota

Uthiĩ na angĩ kana ũikare mwendwa no ngwendete
Ona wanjĩĩra tũthii ũhiki rũciũ no tũgathiĩ
Nĩndakũhe certificate wĩke o ũrĩa ũngĩenda
Tondũ ona ingĩenda gũgũtiga mwendwa ndingĩhota